كان نص عشقُه وجع
ونُص روحه حنين
مين فيكو جارح مين ؟؟!!
يا قلبك المسكين
عايش على امبارح
سهم الفراق جارح
سهم اللقا دبّاح
يا وجعك المرتاح
لدموعك السايلة
على خد أحزانك
مال كف ميزانك
عاشق غاويه الميل ؟!!
مشتاق وطال الليل
على عودك النعسان
يا قلبك الفنّان
شق الوتر مُهجتك
دق الوجع جوّاك !!!
إيه اللي باقي معاك
غير دمعتك والنوح؟!!
مكانتش ناوية تروح
بس إنت خلّيتها
تهدم حيطان بيتها
من كُتر حبّك لها
سدّيت عليها الباب
كَسَرِتْ بيبان قلبها
فطلِع لروحها جناح !!!
ليست هناك تعليقات:
إرسال تعليق