شعر /سحر متولي ———————- جداري و مخلخل

سقفي بقى منخل

حسه الكلام بارد
تقولش ف ديسمبر

الوجهه بلوري
مدهونه للزينه

ومّا جه دوري
جت وقعتي طينه

وقف الكلام في الحلق
ولا عدش صوت طالع

الرحمه فين يا خلق
الكل مش سامع

ف الدنيا بنقاسي
وأهي كلها عيشه

رمّيت جدار البيت
وعملت تعريشه

غزلت توب الفرح
علقته ع الحيطان

وفتحت شباكي
لجل الفرح مايبان

حسيت بدفء الشمس
طبطب على كتافي

قالي بصوت الاب
يا حلوه ماتخافي

مدي بساط الأمل
ع اليأس والحرمان

أنسي بقا اللي كان
وشوفي إيه أدام

اتبسمت عيني
والدمع أصبح فرح

مانا أصلي يا عيني
آسيت كتير م الجرح

فتحت عيني لقيت
ساكنه ف أجمل بيت

شربت نهر الفرح
لحد م إرتويت